दृष्टी!!!

तुझ्या निमित्ताने मी माझ्याकडे पाहतो

मला दिसतात असंख्य बदलत्या प्रतिमा

नवनवीन नाती, नवे मैत्र,

आयुष्यातली अगणित गणितं, अनंत प्रेम,

स्वानुभवाचे खाचखळगे, अनुबंधाची दृढता.

तुझ्या निमित्ताने मी माझ्याकडे पाहतो-

अनुभवतो आकाशभर आनंद ,नदीभर तहान,

समुद्रभर द्वैताचे अश्रू, फ़ुलांची कोमलता,

तर कधी हिऱ्याची कठिणता,

सोन्याची चकाकी, मोत्याचे सौंदर्य.

तुझ्या निमित्ताने मी माझ्याकडे पाहतो-

जाणवते प्रदिर्घ स्वातंत्र्य, मुठभर तत्वे,

विचारांची देवाणघेवाण, प्रगल्भतेची प्रमेये,

अविचाराची मोडतोड,भांडणातला तह,

उल्हासातला साधेपणा,मनाची उदारता.

तुझ्या निमित्ताने मी माझ्याकडे पाहतो-

जाणवतो पक्ष्यांचा कोलाहल,पृथ्वीची उलाढाल,

वाऱ्याची थंड झुळूक, झऱ्याची शुदधता,

प्राण्यांचा सौहार्द, तलावाची आत्मसंतुष्टता

नेमकेपणातील हिंमत, जीवनाचे संगीत,

जन्मभूमीच्या मूठभर मातीचा अखंड लौकीक.

तुझ्याच निमित्ताने मी माझ्याकडे पाहतो-

नि जाणतो माझा विस्तार

नव्याच दृष्टीने शांतवत.......